Мерекелік іс-шаралар - «Умка» бөбекжай-балабақшасы»

Қоштасу – жаңа бастаманың бастауы🎓🔔

admin — Fri, 29 May 2026 13:25:59 +0600

«Қоштасу – жаңа бастаманың бастауы» 🌸
Мақсаты:
Балалардың балабақшадағы тәрбиелік және білімдік тәжірибесін қорытындылау, мектепке деген қызығушылығын арттыру, жаңа өмір кезеңіне сенімді қадам жасауына жағдай жасау, балалық шаққа деген жылы сезім мен естеліктерді қалыптастыру.
Міндеттері:

Балаларды балабақшамен қоштасу мерекесінің мәнімен таныстыру;
Балалардың алған білімдері мен дағдыларын көрсету;
Мектепке деген қызығушылық пен ынтасын арттыру;
Шығармашылық қабілеттерін (ән, би, тақпақ) дамыту;
Достық, сыйластық және бірлік сезімдерін нығайту;
Тәрбиеші мен ата-анаға құрмет пен алғыс сезімін қалыптастыру;
Балалардың жаңа өмір кезеңіне жақсы көңіл күймен қадам жасауына ықпал ету. 🎒📚

Бір шаңырақ астында – тату елміз🤍

admin — Mon, 04 May 2026 13:43:47 +0600

Қазақстан халқының бірлігі күні
Қазақстан – достық пен татулықтың мекені! 🌿✨
Бүгінгі мереке – еліміздегі барлық ұлт пен ұлыстың бір шаңырақ астында тату-тәтті өмір сүріп, өзара сыйластық пен келісімді дәріптейтін ерекше күн 💐
Барша халықты біріктіретін басты құндылық – бейбітшілік, достық және бірлік ❤️
Еліміздің ең басты байлығы – ынтымақ пен татулық!
Мақсаты:
Балалардың Қазақстан халқының бірлігі туралы түсінігін қалыптастыру, достық, татулық және өзара сыйластық сезімдерін дамыту, отансүйгіштікке тәрбиелеу.
Міндеттері:

Балаларды Қазақстан халқының бірлігі күні мерекесінің мәнімен таныстыру;
Еліміздегі ұлттар достығы туралы түсінік беру;
Достық, сыйластық және татулық құндылықтарын насихаттау;
Отанға деген сүйіспеншілік пен мақтаныш сезімін қалыптастыру;
Бірлік пен ынтымақтың маңызын түсіндіру;
Балалардың шығармашылық қабілеттерін дамыту (ән, би, ойын). 🤍

1 Мамыр - Дос болайық бәріміз!

admin — Thu, 30 Apr 2026 12:45:59 +0600

1 Мамыр - Дос болайық бәріміз!

Тақырыбы:«Дос болайық Бәріміз»

Тобы: «Қарлығаш»

Күні: 30.04.2026

Мақсаты: Бірлік мерекесінің – қазақстандықтар үшін татулық пен ынтымақ мейрамы екенін түсіндіру.Қазақстанда тұратын көп ұлттың достығы мен тұтастығын, салт- дәстүрін сыйлауға тәрбиелеу.Мерекелік көңіл- күй сыйлау.Қазақстанда тұратын көп ұлттың достығы мен тұтастығын, адал ниеті мен мақсат-мүдде ортақтығының символына айналған ынтымақтастық мерекені ұмытпауға баулу.«Құрмет», «Сүйіспеншілік», «Достық», «Ынтымақ» құндылықтарының маңызын түсіндіру.

Тәрбиеші:Қош келдіңіздер құрметті қонақтар, қадірлі балалар!1 мамыр – Қазақстан халқының ынтымағы мен бірлігі мерекесі құтты болсын!

Бүгінгі күн ерекше, өйткені 1 мамыр Қазақстан халықтарының бірлігі күні мерекесі қарсаңында «Бірлігі бекем, тірлігі көркем – Мәңгілік ел Қазақстан!» атты ертеңгілік өткізіліп отыр.Қазақстан түрлі ұлттардың басын қосқан ұлы мекен.Олардың салт-дәстүрлері, тілі мен мәдениеті жоғалмас үшін қолайлы жағдай жасалған.

Ендеше, ынтымақтастығымыз бен тыныштығымыз одан әрі нығая түссін деген тілекпен іс-шарамызды әнұранмен бастайық!

Әнұран орындалады

Тәрбиеші:Бүгінгі мерекеге біздің балабақшадағы топ бүлдіршіндері өздерінің өнерлерін алып келіп отыр.Балалардың орындауында Достық әні.

Ән: Достық

Тәрбиеші: Келесі кезекті «Қарлығаш» Тобының балаларының тақпақтарына берейік.

Інкар:

Кең байтақ, көз жетпейтін жерім менің.

Таулы орман, жасыл жайлау, көлім менің

Бүгінде бар әлемге даңқың жетті

Тәуелсіз Қазақстаным – елім менің!

Айсұлтан:

Күте тұғын асыға әр күнін біз,

Арналатын ең тәтті ән жырымыз

Мерекелі мерейлі айдың басы

Құтты болсын Бірінші Мамырымыз!

Томирис:

Мамырдың бірі-Достық күні

Ән салып билеген халықтың үні

Тұтасып тойлаған ұлттар

Керемет мереке, Мамырдың бірі.

Әмина:

Әрі сұлу, әрі игі

Келші, мамыр шуақты

Он бір ұлы бар үйдің

Жалғыз қызы сияқты

Би: Түрік биі

Тәрбиеші:

Мамыр қандай, шіркін-ай, мамыр қандай!

Айнала жасыл кілем жамылған жай.

Алатауым басына ақ шәлі орап,

Мойнына гүлден алқа тағылғандай.

Мамыр қандай, шіркін-ай құлпырады.

Күй толқын көңіліне жыр тұнады.

Жыл еркесі гүл мамыр, сұлу мамыр,

Секілді адамзаттың ынтымағы – дей келе балалардың орындауында ән: Келді май.

Ән: Келді май

Тәрбиеші: «Қазақта бірлік болмай,тірлік болмайды»-деген ұлағатты ұғым бар. Ендеше елімізде бейбіт өмір сүріп жатқан ұлттармен ұлыстар өкілдерінің татулығы артып, Қазақ елінің нығайып, өркендеуіне өз үлесімізді қоса берейік.

Алдарыңызда мың бұралған әсем қыздарымыздың орындауында Испан биін қарсы алыңыздар.

Би: Испан биі

Тәрбиеші: Балалар қараңдаршы, мынау жер шары суретінің кішірейтілген түрі - карта.Мұнда Отанымыз - Қазақстан бар.Бізде 130-дан астам ұлт өкілдері тұрады, олармен тату-тәтті өмір сүреміз.Қазақстан бүгінде ұлттар мен ұлыстар мекендеген достық пен туысқандықтың, ынтымақ пен ырыстың ордасына айналды.

Қане балалар бәріміз экранға қарайық.

1 – слайд: Сурет арқылы әр ұлттардың киімдерімен таныстыру.

Балалар, осы ұлттардың барлығы да Қазақстанда тұрады.Қазақстан көп ұлтты мемлекет.Олар өз елдерінде болмасада, Қазақстанды - елім деп, жерін – жерім деп, құрметтеп, үлкен үлгілі, бақытты, өнегелі отбасы болып өмір сүруде.Әлем халықтарының тату – тәтті бейбітшілікте, ынтымақтастықта өмір сүріп отырғаны біздің қазақ елінің арқасы және олар мұны түсініп, жақсы біледі.Сол себепті біздің елімізді қадір тұтып, құрметтейді.

2 – слайд: Экраннан Елбасы құттықтауы мен Астана қаласы орталық алаңда өткізіліп жатқан шеруді тамашалау.(түсіндірме беру)

Ертең 1 мамыр мерекесі.Біздің де Алматы қаласының халқы орталық алаңға осындай салтанатты шеруге шығады.Әр ұлт өкілдері өздерінің ұлттық киімдерін киіп, өнерлерін көрсетеді.

Ал, балалар біз сіздермен бірге ойын ойнайық.Ойынның аты : Ұлттық бас киімді табуға көмектес.Ойынның шарты экрандағы суретке қарап, әр ұлттың бас киімін табуға тырысыңдар.

Балалардың орындауында ән: Ағайынбыз бәріміз.

Тәрбиеші: балалар қазір жылдың қай мезгілі?

-Көктем.

-Дұрыс айтасыңдар.Көктемде не көп жауады?

-Жаңбыр.

-Әрине.Ендеше біздің Айлиннің орындауындағы Жау-жаңбыр әнін қарсы алайық. Махмутова Айлиннің орындауында «Жау-жау жаңбыр» әні.

Тәрбиеші: Бұл күні қырқаларға гүл тұнады,

Бар әлем бір-ақ сәтте құлпырады.

Әлемге дос құшағын жая келген,

Армысын, бар халқымның ынтымағы!

Бармысың, қазағымның ынтымағы!

Балалар біздің елге көршілес жатқан елдің бірі орыс халқы.Алдарыңызда кішкентай бүлдіршіндеріміздің оырндауындағы орыс биін қарсы алыңыздар.

Би: Орыс биі

Тәрбиеші: Балалар, көктем келіп, айналаның бәрі құлпырып, тіршіліктің бәрі оянады.Балалар, бізге қарай біреу келе жатыр.

(ақ көгершін ұшып келеді, қолында шарлар)

Көгершін: Мен ақ көгершінмін!

Бейбіт өмірдің белгісімін

Мерекемен құттықтаймын

Сізге шарлар сыйлаймын.

(шарларды үлестіреді)

Тәрбиеші: Рахмет, ақ көгершін!Ал, балалар, ақ көгершінге ән айтып берейік.

Хор: Әрқашан күн сөнбесін

Осымен біздің «Бірлігі бекем, тірлігі көркем – Мәңгілік ел Қазақстан!» атты мерекелік іс-шарамыз аяқталды. Барлықтарыңызға рақмет!Мереке құтты болсын!

Ғарышқа бірге самғайық 🚀

admin — Fri, 10 Apr 2026 12:56:49 +0600

Ғарышқа бірге самғайық

Күні: 10.04.2026 жыл
Тобы: Мектепалды «Сұңқар» тобы

Мақсаты:

Балалардың ғарыш әлемі туралы білімдерін кеңейту, танымдық қызығушылықтарын арттыру.

Міндеттері:

Білімділік: Ғарыш, ғаламшарлар, ғарышкерлер туралы түсініктерін қалыптастыру, сөздік қорларын молайту.
Тәрбиелік: Балаларды ұйымшылдыққа, достыққа, батылдыққа тәрбиелеу.
Дамытушылық: Сөйлеу тілін, ойлау қабілетін, есте сақтауын дамыту.
Әдіс-тәсілдер: сұрақ-жауап, әңгімелесу, ойын, көркем сөз.
Көрнекіліктер: ғаламшарлар, зымыран, жұлдыздар суреттері, слайдтар.
Билингвалды компонент:
Ғаламшарлар – планеты
Зымыран – ракета
Ғарышкерлер – космонавты

Шаттық шеңбері

Біз әдепті баламыз,
Біз ерекше боламыз.
Қонақтарды көргенде,
Сәлемдесіп аламыз.
Арайлап таң атты,
Алтын сәуле таратты.
Жарқырайды күніміз,
Жарқырайды даламыз.
Қуант, шаттан, алақай,
Қуанатын күн бүгін.
Қайырлы күн балалар!
Сәлеметсіздер ме, қонақтар!

Әңгімелесу

Тәрбиеші балаларға ғарыш, ғаламшарлар, зымыран және ғарышкерлер туралы әңгімелейді. Юрий Гагарин, Тоқтар Әубәкіров және Талғат Мұсабаев туралы мәлімет береді.

Тақпақтар

Айлин:
Ғарышқа үш рет сәтті сапар жасаған,
Атақты ғарышкер Талғат Мұсабаев.
Ғарыштың кеңістігін бағындырған,
Ел мақтанышы болған дара азамат.
Ислам:
Алтын бесік тербеткен,
«Байқоңырдан» аттандың.
Ең алғашқы қазақтың,
Ғарышкері атандың.
Мақтанады өзіңмен,
Бүгінгінің баласы.
Мүмкін олар ертең-ақ,
Ізбасарың болады.

Балалар ғарыш әлеміне саяхатқа аттанып, түрлі ғаламшарларға тоқтап, тапсырмалар орындайды.

Венера ғаламшары

«Сөздер мен дыбыстар» тапсырмасы.

Дыбыс пен әріптің айырмашылығы.
Дауысты және дауыссыз дыбыстар.
«Ана» сөзіне дыбыстық талдау жасау.

Ойын: «Жемістер мен көкөністер»

Сатурн ғаламшары

Ойын: «Жасырынған сөзді тап»
1 2 3 4 5 6 7 8 9
А Н А
Н А Н
А Ғ А

Юпитер ғаламшары

Сергіту сәті.
Кел, балалар, кәнекей,
Парақтайық әліппені.
Талай қызық күтуде,
Бәрімізді әлемде.
Жалықпа сен, жалықпа,
Оқы, тоқы арманда.
Бәрін білген балаға,
Жақын болар алыста.

Марс ғаламшары

Робот қонаққа келеді.
Балалар өз білімдерін көрсетеді.
Томирис:
А – деген ол аналар ғой ардақты,
Ә – деген ол әжелер ғой салмақты.
Б – деген ол балалар ғой әдемі,
Біздің елде үшеуі де кәделі.
Сондықтан да алшақ кетпес расында,
Тұрады олар алфавиттің басында.
Ифрат:
«Ғ» – Ғасыр, ғылым, ғаламшар,
Ойлаған ғалым адамдар.
Ғарышкерлер ұшқанда,
Жасайды ғажап қадамдар.
Мен «Ғ» әріпімін.
Айзере:
«Н» – Нан әлемнің азығы,
Дастарқанның қазығы.
Нар – түйенің асылы,
Өрісі ел жазығы.
Мен «Н» әріпімін.
Ислам:
Барлық әріп бағалы,
Айттық әділ бағаны.
Әріпсіз сөз болмайды,
Буын онсыз толмайды.
Адам барлық әріпті,
Ардақтайды, қолдайды.
Айлин:
Тиіспе, күшік, қоянға,
Тентектікті қойыңдар.
Кикілжің жоқ араңда,
Тәтті-тәтті болыңдар.

Қорытынды

Робот балалардың білімдерін мақтап, сыйлықтар табыстайды.
Тәрбиеші:
Ал балалар тұрайық,
Үлкен шеңбер құрайық.
Көріскенше күн жақсы,
Сау-саламат болыңдар!

«Ұлыстың ұлы күні – Наурыз!»🌷

admin — Fri, 27 Mar 2026 16:08:29 +0600

🌟 Мерекенің басты мәні мен тарихы
Табиғаттың жаңаруы: 21 наурыздан 22 наурызға қараған түні күн мен түн теңеледі. Осы күннен бастап қыс аяқталып, жер қызып, табиғат оянады, жан-жануарлар төлдейді. Сондықтан қазақтар бұл күнді "Жыл басы" деп санаған.
Татулық пен бірлік: Бұл — реніштер кешірілетін, араздық ұмытылатын, адамдар бір-біріне тек жақсылық пен амандық тілейтін тазалық пен мейірімділік мейрамы.
Тарихы: Кеңес өкіметі тұсында 1926 жылы бұл мейрамға "діни мереке" деген сылтаумен тыйым салынған болатын. Араға 62 жыл салып, 1988 жылы Наурыз мейрамы халқымызға қайта оралды.
🍲 Наурыздың басты дәстүрлері мен рәсімдері
Мерекенің өзіндік ғасырлар бойы қалыптасқан ерекше жоралғылары бар:
Наурыз көже: Мерекенің басты символы. Ол міндетті түрде 7 түрлі дәмнен (су, ет, тұз, май, құрт, астық (бидай/күріш), сүт) дайындалады. 7 саны — қасиетті ұғым. Наурыз көжені тоя ішкен адам "келесі жылға дейін тоқшылықта болады" деген сенім бар.
Көрісу (Амал мерекесі): Адамдар бір-бірімен қос қолдап амандасып, "Жылыңыз құтты болсын!", "Жас құтты болсын!" деп амандық-саулық сұрасады.
Қыдыр ата: 22 наурызға қараған түні үйлерге Қыдыр ата келіп, бата береді деп күтілген. Сондықтан бұл түні үйдің ішін тазалап, ыдыстарды аққа (сүт, айран) толтырып қоятын болған.
Алтыбақан мен Ұлттық ойындар: Ауыл сыртында алтыбақан құрылып, жастар ән айтып, көңіл көтереді. Сонымен қатар көкпар, аударыспақ, қазақша күрес, қыз қуу сияқты ұлттық спорттық ойындар ұйымдастырылады.
Наурызнама: Қазіргі Қазақстандағы жаңа формат
Қазақстанда Наурыз мейрамын жаңаша сипатта, мәдени маңызын арттыра отырып атап өту дәстүрге айналды. 14-23 наурыз аралығында "Наурызнама" онкүндігі өткізіледі. Әр күннің өзіндік ерекше мағынасы бар:

Ана – өмір шуағы 👩‍👧‍👦❤️

admin — Fri, 06 Mar 2026 13:07:46 +0600

«Ана – өмір шуағы»
Мақсаты:
Балалардың анаға деген сүйіспеншілігін, құрметі мен алғысын арттыру, ананың отбасындағы орны мен маңызын түсіндіру, мейірімділік пен адамгершілік сезімдерін қалыптастыру.
Міндеттері:

Балаларды Аналар күні мерекесінің мәнімен таныстыру;
Анаға деген сүйіспеншілік пен құрмет сезімін дамыту;
Балалардың шығармашылық қабілеттерін (ән, би, тақпақ) дамыту;
Жылы қарым-қатынас пен ізгі тілектер айтуға үйрету;
Отбасы құндылықтарын дәріптеу және мейірімділікке тәрбиелеу.

Өрт – тілсіз жау 🔥

admin — Thu, 19 Feb 2026 13:25:33 +0600

Өрт – тілсіз жау

Күні: 19. 02. 2026 жыл

Тақырыбы: Өрт – тілсіз жау!

Мақсаты: Балаларға өрттің қауіпті екенін түсіндіру, өрт қауіпсіздігі ережелерін үйрету, сақтыққа тәрбиелеу.

Көрнекіліктер: Өрт сөндіруші суреттері, қызыл және сары шарлар, өрт қауіпсіздігі белгілері.

Жүргізуші:
Армысыздар, құрметті қонақтар, балалар! Бүгін біз өте маңызды тақырыпқа жиналып отырмыз. Ол – өрт қауіпсіздігі. Өрт – тілсіз жау. Сондықтан оның алдын алып, қауіпсіздік ережелерін білуіміз керек.

Тақпақтар

Медина
Өрт шықпасын үйімде,
Сақтық жүрем күнде мен.
Отпен ойнап көрмеймін,
Ережені білем мен.

Сафиназ
Өрт – қауіпті, білеміз,
Одан әркез жүреміз.
Сақтық жасап әрдайым,
Аман-есен жүреміз.

Айзере
Өрт сөндіруші ағалар,
Батыр біздің жандар.
Қауіп төнсе қашанда,
Көмекке олар даяр.

Көрініс

Қуыршақ:
Мен сіріңкемен ойнағым келеді.

Балалар:
Жоқ! Сіріңкемен ойнауға болмайды!

Жүргізуші:
Дұрыс айтасыңдар, балалар! Сіріңке – ойыншық емес. Ол өрттің шығуына себеп болуы мүмкін.

Ойын «Болады – болмайды»

Жүргізуші сұрақ қояды, балалар жауап береді.

Сіріңкемен ойнауға бола ма? (Жоқ!)
Үлкендердің рұқсатынсыз электр құралдарын қосуға бола ма? (Жоқ!)
Өрт шықса үлкендерді шақыру керек пе? (Иә!)
Қауіпсіздік ережесін сақтау керек пе? (Иә!)

Ән

Балалар «Өрттен сақ болайық» немесе қауіпсіздік туралы ән орындайды.

Жұмбақ

Жүргізуші:
Қызыл түсті машина,
Жалтылдайды шамы да.
Өрт шыққанда келеді,
Көмек беріп сөндіреді.

Балалар: Өрт сөндіру көлігі!

Қорытынды

Жүргізуші:
Балалар, бүгін біз өрттің қауіпті екенін білдік. Ең бастысы – қауіпсіздік ережелерін сақтау. Сонда өзімізді де, достарымызды да қорғай аламыз.

Барлығы бірге:
🔥 «Өрттен сақ болайық!» 🔥

Қазақстан – менің Отаным, Республика – асқақ мерекем!❤️

admin — Fri, 24 Oct 2025 12:58:46 +0600

Мақсаты:
Балалардың Отанға деген сүйіспеншілігін арттыру, Қазақстан Республикасына деген мақтаныш сезімін қалыптастыру, мемлекеттік рәміздерді құрметтеуге және елін сүюге тәрбиелеу.

Міндеттері:
Балаларды Республика күні мерекесінің маңызымен таныстыру 📚, мемлекеттік рәміздер туралы білімдерін кеңейту 🏛️, патриоттық сезімдерін дамыту ❤️, бірлікке, достыққа және татулыққа баулу 🤝, туған жерін құрметтеуге тәрбиелеу 🌿.

Білім күні – бақытқа бастар жол📚

admin — Tue, 02 Sep 2025 12:51:13 +0600

Мақсаты:
Балалардың жаңа оқу жылын шат көңілмен қарсы алуына ықпал ету, білім әлеміне деген қызығушылығын арттыру, балабақшаға деген сүйіспеншілігін қалыптастырып, достық пен мейірімділікке тәрбиелеу.
Міндеттері:
Балаларды Білім күні мерекесінің мәнімен таныстыру, көтеріңкі көңіл күй сыйлау, танымдық белсенділігін дамыту, бір-біріне қамқор болуға, сыйластыққа және ұйымшылдыққа баулу.